ދާދިފަހުން ބޭއްވި މާލޭ ސިޓީގެ މޭޔަރުކަމުގެ އިންތިހާބުގައި ވާދަކުރެއްވި އިސްމާއިލް ޒަރިޔަންދު، ކުރީގެ ރައީސް އަބްދުﷲ ޔާމީން އިސްވެ ހުންނަވައި އުފެއްދެވި ޕީޕަލްސް ނޭޝަނަލް ފްރަންޓް (ޕީއެންއެފް) އަށް ރަސްމީކޮށް ސޮއިކުރައްވައިފި އެވެ.
ޕީއެންއެފްގެ އޮފީހުގައި މިދިޔަ ހޯމަ ދުވަހުގެ ރޭ ބޭއްވި ހާއްސަ ރަސްމިއްޔާތެއްގައި، އޮޑިޓިން އަދި އެކައުންޓިން ދާއިރާގެ ތަޖުރިބާކާރު ޒަރިޔަންދު ވަނީ އޭނާގެ މެންބަޝިޕް ފޯމު ރައީސް ޔާމީނާ ހަވާލުކުރައްވާފަ އެވެ.
މިދިޔަ ހޮނިހިރު ދުވަހު ބޭއްވި ލޯކަލް ކައުންސިލް އިންތިހާބުގައި ޒަރިޔަންދު މޭޔަރުކަމަށް ވާދަކުރެއްވީ އަމިއްލަ ގޮތުންނެވެ. ނަމަވެސް، އެ އިންތިހާބުގައި އޭނާ ކެމްޕޭން ކުރެއްވީ ރައީސް ޔާމީންގެ ފުރިހަމަ ތާއީދާއެކުގަ އެވެ. އިންތިހާބުގެ ނަތީޖާ ދެއްކި ގޮތުން ޒަރިޔަންދަށް 6،302 ވޯޓު ލިބިވަޑައިގަތް އިރު، މިއީ އެ އިންތިހާބުގައި ތިންވަނައަށް އެންމެ ގިނަ ވޯޓު ލިބުނު ކެންޑިޑޭޓެވެ.
ޒަރިޔަންދު މީގެ ކުރިން ބޮޑަށް ފާހަގަކުރެވިފައިވަނީ ކުރީގެ ރައީސް މުހައްމަދު ނަޝީދުގެ އަރިސް ބޭފުޅެއްގެ ގޮތުގަ އެވެ. ނަމަވެސް، މޭޔަރުކަމުގެ ކެމްޕޭން ތެރޭގައި އޭނާ ވިދާޅުވެފައިވަނީ ސިޔާސީ ދާއިރާއަށް ނުކުމެވަޑައިގަތުމަށް އެންމެ ބޮޑު ހިތްވަރެއް ދެއްވީ ރައީސް ޔާމީން ކަމަށާއި، އެމަނިކުފާނަކީ ގައުމީ ތަރައްގީގެ ސާފު ތަސައްވުރެއް އޮތް ލީޑަރެއް ކަމަށެވެ.
ކުރީގެ މަޝްހޫރު ގޯލްކީޕަރު ޒަރިޔަންދު ޕީއެންއެފާ ގުޅިވަޑައިގަތުމަކީ، އާ ޕާޓީއެއްގެ ގޮތުގައި އުފެދިގެން އަންނަ ޕީއެންއެފަށް ލިބުނު އިތުރު ކުރިއެރުމެއްގެ ގޮތުގައި ސިޔާސީ މުރާސިލުން ސިފަކުރެ އެވެ. މާލޭގެ މޭޔަރުކަމުގެ ގޮނޑި މިފަހަރު ކާމިޔާބު ކުރެއްވީ އެމްޑީޕީގެ ކެންޑިޑޭޓް އާދަމް އާޒިމެވެ.
