މަޝްހޫރު ވިޔަފާރިވެރިޔާ އަފި ޖުމްހޫރީ ޕާޓީގެ ލީޑަރު ޤާސިމް އިބްރާޙީމްގެ ތާއީދު، ކުރިއަށް އޮތް ލޯކަލް ކައުންސިލް އިންތިހާބުގައި ޕީއެންސީގެ ފަރާތުން މާލޭގެ މޭޔަރުކަމަށް ވާދަކުރައްވާ މޫސާ އަލީ ޖަލީލަށް އޮތްކަން ހާމަކުރައްވައިފިއެވެ.
ގާސިމް ވިދާޅުވީ މޫސާ އަލީ ޖަލީލަކީ، ޤައުމީ ހިދުމަތުގެ ފަހުރުވެރި ރެކޯޑްތަކެއް އޮތް، މި ޤައުމުގެ ދިފާއުގައި އަގުހުރި ހިދުމަތްތަކެއް ކުރައްވާފައިވާ ބަތަލެއްކަމަށެވެ. އެގޮތުން 1988 ވަނަ އަހަރު ނޮވެންބަރުމަހު ތިނެއްގައި ޤައުމު ސަލާމަތްކުރުމަށް މޭ އައްޑަނައެއްގެ ގޮތުގައި ހައްދަވައިގެން ދުޝްމަނުންގެ ކުރިމައްޗަށް ހިތްވަރާއި އީމާންތެރިކަމާއެކު ނުކުންނެވުމުންވެސް މޫސާ އަލީ ޖަލީލްގެ ގަދަފަދަ ޤައުމީ އަޒުމު ސާބިތުކޮށްދޭކަނ ގާސިމް ވިދާޅުވިއެވެ.
އެއިރުއްސުރެ މިއަދާ ހަމަޔަށްވެސް މޫސާ އަލީ ޖަލީލް ހުންނެވީ އަބަދުވެސް ޤައުމަށްޓަކައި ތައްޔާރަށްކަމަށާއި ކޮންމެ ސަރުކާރަކުން މަތިކުރެއްވި ކޮންމެ ވަޒީފާއެއްގެ ވާޖިބުވެސް އަދާކުރެއްވީ ތެދުވެރިކަމާއެކުކަމަށް ގާސިމް ވިދާޅުވިއެވެ. އަދި މޫސާ އަލީ ޖަލީލަކީ ފަސްބައިގާ ކިލަނބުކަމެއް ނެތް އެއްވެސް މީހަކާމެދު ކުޑައިމީސްކޮށް ކުރެއްވި ކަމެއް ނެތް. ނުހަނު ހުލްގު ހެޔޮ، އެންމެންގެ ލޯބި ލިބިވަޑައިގެންފައިވާ ތަޖްރިބާކާރު ޝަހްސިއްޔަތެއްކަމަށްވެސް ގާސިމް ވިދާޅުވިއެވެ.
އެހެންކަމުން އޭނާގެ ބަސް އަހާ އެންމެން މޫސާ އަލީ ޖަލީލަށް ވޯޓް ދިނުމަށް ގާސިމްވަނީ އެދިވަޑައިގެންފައެވެ.
ގާސިމް ވިދާޅުވީ ރާއްޖޭގެ ވެރިކަންކުރާ ސަހަރު ހިންގެވުމުގެ އެންމެ އިސް މަޤާމަށް މޫސާ ޖަލީލަށްވުރެ ތަޖްރިބާކާރު، އަމާނާތްތެެރި، ހިދުމަތްތެރި، ޤާބިލް، ކުފޫހަމަވާ އެހެން ކެންޑިޑޭޓަކު ނެތްކަމަަށެވެ.
އަންނަ ލޯކަލް ކައުންސިލްގެ އިންތިހާބު އޮންނާނީ އަންނަމަހުގެ 4 ވަނަދުވަހުއެވެ. އެ އިންތިހާބުގައި މާލޭގެ މޭޔަރުކަމަށް 5 ކެންޑިިޑޭޓަކު ވާދަކުރެއެވެ.
